13
Sosue' 'kpa -kea" la ka -cɔɔn'- ka-. -Wɛe Nyɔsoa wlu ɔ -pee ka ɛ 'na: -Ɩn -kpa -kea" -wɛ, 'de -mɛ 'blʋa klae" sie 'emu -ɩ -je kpʋʋn ɛ-. 2 'Blʋa -sia 'emu -ɩ -jea kpʋʋn ɛ ɩ ka: Ka Filitɛn nyʋ 'a 'blʋa -wee' -tia a, ɛ ke Kɛsʋrʋ nyʋ 'a 'blʋa ke, 3 ɛmɛ -nɩ 'blʋa 'a 'fɔ -ɛ -tba' 'de Siɔɔ- -gbuu -pʋn" -ɛ -mua' mamaʋ -ɛ -nynia' Esipʋ 'a -paʋn "i, -ɛ -jea Eklɔn 'de 'kwea fɔo, ɩa' 'blʋa 'a 'fɔ tu -wee' nyʋ 'jɩ Kanaa 'daa-. Ɩmɩ -nɩ filitɛn nyʋ 'a tʋbo" -mm" -ʋʋ -wlʋa Kasa o, Asɩdɔdɩ o, Asɩkelɔn o, Gatɩ ke Eklɔn ke, ɩ ke Afi nyʋ 'a -nɩ ke-. 4 -Jɩ -sia 'emu ke -nɛ -ɩ -jea kpʋʋn ɩ mɩ -nɩ Kanaa nyʋ 'a 'blʋa "klein Sidɔn nyʋ 'blea, -ɛ -tba' 'de Meala -ɛ -jɛa Afɛkɩ 'de Amɔɔ -nyʋ 'a -paʋn "i, 5 Kibli nyʋ 'a -nɩ ke Diban 'a 'jrʋ 'a 'wlʋʋ "klein fɔo, dɛ -tba' 'de Baalɩ Gadɩ 'de Ɛrmɔ crʋ -sɔn -ɛ -jɛa Lebo Amatɩ, 6 ɛ ke 'blʋa 'a 'fɔ crʋ nɩa 'dii 'de Diban ke Micrefɔtɩ Maimʋ 'nynɩ -ta Sidɔn nyʋ -tia a. 'Ma muɛ nyʋ -tia 'de 'blʋa -nɩa 'mʋa- 'di i nʋa' 'a ka Israɛ -nyʋ a 'kpaa 'emu ɛ. Nɔ" -tɩ ɛ 'jea 'kan nɩ ɛ, -mɛ 'blʋa -nɩa 'mʋa- -ɩn -po' 'soa -ɩn -jeɛ 'ʋn -seea' ɛ 'je ʋʋpʋ 'a dɛ 'kpa ka 'ɩn "sia ɛɛ' 'nynɩ 'de -ʋn -pee ɛ.7 Kaan ka la, -ɩn -sea' 'blʋa -nɛ 'ʋn 'de 'blʋa 'a 'blowɔn -mɛ" nyɛ ke Manase 'a 'blʋa 'a 'blowɔn 'ɔ tɔo 'nynɩ 'de ɛ 'je ʋʋpʋ 'a dɛ 'kpa.
8 'Blʋa 'a 'blowɔn 'ɔ tɔo -sia 'emu o, Rubɛnɩ -nyʋ ke Gadɩ -nyʋ 'a 'blʋa 'a 'blowɔn 'je ʋʋpʋ 'a -nɩ 'kɛn 'mɛ. Moisɩ, Nyɔsoa 'a dbo nʋɩ, "nyɩɛ ʋʋpʋ 'mɛ 'de Sudɛn 'ɛ 'jrʋ 'a 'wlʋʋ 'ɩn. 9 Dɛ -tba' 'de Aroɛ ɛ, ɛ 'mʋ mamaʋ 'sʋ ɛ je Arnɔ -gbuu jɛɛ- -wɛe ɛ mu ɛ jɛɛ "kwi -kwlɔ -nɩa 'de -toʋn" 'a -kwea' ɛmɛ -ble dɛ -tba' 'de Mɛdeba 'a -toʋn" -wee' -ɛ -jɛɛ Dibɔn 10 ɛ ke Siɔn, Amɔɔ -nyʋ 'a 'blʋa jei -ɔ -tea 'e Ɛsbɔn 'ɔ "kwi -kwlɔ -wee' -ɛ -nynia 'e Amɔ nyʋ 'a -paʋn "i. 11 Ɛmɛ -ble Galadɩ -nyʋ 'a 'blʋa ke, Kɛsʋrʋ nyʋ 'a blʋa 'a 'blowɔn ke Makatɩ -nyʋ 'a 'blʋa ke, Ɛrmɔ crʋ ke Basan blʋa -wee' -ɛ mua -ɛ -nynia Salɩka a: 12 'De Basan blʋa 'di ɛ, ɛmɛ -nɩ Ɔkɩ ɔ nɩɛ Refaimʋ -nyʋ 'a de 'bɔɔ i, -ɔ -tea 'de Astarɔ 'dewlɛ Ecrei 'a 'blʋa ɔ -tea "jrukpɔ i -wee'-. Moisɩ 'a tʋ du 'blʋa jeʋn -nɩa 'mʋa- -wee' 'mɛ -wɛe ɔ -sa ʋʋa' 'blʋa ʋʋpʋ 'kwa. 13 'Ka mɔ ɛ nɩ mɔɔ' -cɛ" -o, -mɛ Israɛ -nyʋ se Kɛsʋrʋ nyʋ ke Makatɩ -nyʋ 'a 'blʋa ʋʋpʋ 'kwa -sa, ɛ nʋɛ' ʋʋpʋ "tiɛ 'de Israɛ -nyʋ "kwlu ke dɛ -jɛa -sɩan a. 14 Lefi 'a "nynuu 'a 'blʋa 'a 'blowɔn -mɛ ɛ, ɛɛ' 'sʋ 'a 'sʋ ɔ se 'blʋa "nyɩ -ɛ -je ʋʋa' 'kɛn nɩ-. Dɛ-nʋɛ' mɛ -nɩ 'sraadɛ -ɛ -wee' nɛ dia -ɛ -nɩa Nyɔsoa Israɛ -nyʋ 'a Kea 'a dɛ ɛ, ɛmɛ -nɩ ʋʋpʋ -nɩ ka Kea "sia ɛɛ' 'nynɩ ɛ.
Rubɛnɩ -nyʋ 'a 'blʋa 'a 'blowɔn 'ɔ 'fɔ
15 'Blʋa Moisɩ "nyɩa -gbɛin" 'a wɔn -ɩ -nɩa 'de Rubɛnɩ 'a 'blʋa 'a 'blowɔn 'di 16 tba 'de "kwi -kwlɔ nyɔɔ 'daa Aroɛ -ɛ -nɩa Arnɔ -gbuu wɔin ɛ ke "kwi -kwlɔ -ɛ -nɩa 'e -toʋn" 'a -kwea' a. Ɛmɛ -ble 'kpʋʋ "klein -nɩa 'de Mɛdeba 'dei, 17 Ɛsbɔn ke ɛɛ' -kwlɔ mɩɩ" -nɩa "tian "kpei, ɛmɛ -nɩ Dibɔn o, Bamɔtɩ Baalɩ o, Bɛtɩ Baalɩ Meɔn o, 18 Ɩatɩ o, Kedemɔtɩ o, Mefatɩ o, 19 Kɩliataimʋ o, Sibʋma o, Serɛtɩ Asaa -nɩa 'de crʋ nɩa 'de -toʋn" -pʋn" "jru o, 20 Bɛtɩpeɔ o, Piska' crʋ 'a -gbɩn wɔin ɛ ke Bɛtɩ Ajesimɔtɩ ke, 21 'De -mɛ 'de ɛ, ɛmɛ -nɩ "kwi -kwlɔ "klein -nɩa 'de 'kpʋʋ "kpei ke 'blʋa "klein Siɔn -nɩa Amɔɔ -nyʋ 'a 'blʋa jei -tea 'de Ɛsbɔn -tea "jrukpɔ i ɛ, -ɩ ke Madian nyʋ Moisɩ 'a tʋ dua -ta -due ɛ, Siɔn 'ɔ tʋ kpʋan -ʋʋ -tia" 'de 'blʋa -nɩa 'mʋa- 'di: Efi o, Rekɛmʋ o, Suu o, Uu ke Reba ke. 22 'De nyʋ Israɛ -nyʋ 'dba "kwlu, Beɔ 'ɔ "ju Balaamʋ dɩ -sii nɩ 'e 'wɛ -ke, ʋʋ 'dbaa ɔ -placnɛ "i -ke 'de ɛɛ nɔ" tu 'di. 23 Rubɛnɩ -nyʋ 'a -paʋn mɛ -nɩ Sudɛn -gbuu ke ɛ 'dei ke. 'Blʋa 'a 'fɔ ʋʋ -sea' 'ʋn -ɛ -jea ʋʋa' dɛ 'kpa, 'de Rubɛnɩ -nyʋ 'a -gbɛin" 'a wɔn o, "kwi -kwlɔ ke ɛɛ' -kwlɔ ɛ 'blea 'nynɩ i mɩ -nao.
24 Moisɩ "nyɩ Gadɩ 'a 'blʋa 'a 'blowɔn 'ɔ -gbɛin" 'a wɔn 'ɔ -nɩ 'kɛn 'mɛ -ke. 25 Ʋʋa' 'blʋa mɛ -nɩ Jasɛɛ o, Galadɩ 'a "kwi -kwlɔ -wee' ke Amɔɔ -nyʋ 'a 'blʋa 'a tɔo -ɛ -mua' -ɛ -nynia' Aroɛ 'de Rabatɩ -pʋn". 26 Dɛ -tba' 'de Ɛsbɔn ɛ 'mʋ ɛ je Ramatɩ Misɩpe ke Betonimʋ jɛɛ-, -wɛe dɛ -tba' Maanaimʋ ɛ 'mʋ ɛ je Debii 'a -paʋn "i nyni. 27 'De Sudɛn 'ɛ -toʋn" 'di ɛ, ɛmɛ -ble Bɛtɩ Aramʋ o, Bɛtɩ Nimʋra o, Sukɔtɩ ke Safɔn ke, ɩmɩ -ma' Siɔn -nɩa 'blʋa jei 'de Ɛsbɔn 'ɔ 'blʋa 'a tɔo -sia 'emu ɛ, ɛ ke Sudɛn 'ɛ 'kpʋʋ "klein -nɩa 'de 'jrʋ 'a wlʋʋ 'ɩn fɔo mɛ -nɩ ɛɛ' -paʋn -ɛ -mu' -ɛ -nyni' Senesarɛtɩ 'a "ni 'fla -pʋn". 28 'Blʋa 'a 'fɔ ʋʋ -sea' 'ʋn -ɛ -jea ʋʋa' dɛ 'kpa, 'de Gadɩ -nyʋ 'a -gbɛin" 'a wɔn o, "kwi -kwlɔ ke ɛɛ' -kwlɔ ɛ 'blea 'nynɩ i mɩ -nao.
29 Moisɩ "nyɩ Manase 'a 'blʋa 'a 'blowɔn 'ɔ tɔo 'a -nɩ 'kɛn, ʋʋ -sea' 'ʋn 'de ɔɔ' -gbɛin" 'a wɔn 'nynɩ i. 30 Ʋʋa' 'blʋa tba Maanaimʋ, ɛmɛ -nɩ Basan, Ɔkɩ -nɩa 'blʋa jei 'de Basan 'a 'blʋa -wee'-, ɛ ke Jai 'a -kwlɔ 'ɔ kwla -mɛɛo"- -ɩ nɩa 'de Basan ke. 31 Galadɩ 'a 'blʋa 'a tɔo o, Astarɔ ke Ecrei -ɩ -nɩa Ɔkɩ -nɩa 'e Basan 'a "kwi -kwlɔ klae" 'a 'soa -nɩ mɛ ʋʋ "nyɩ Manase 'a "ju Makii 'a -kwlin 'a tɔo ʋʋ -sea' 'ʋn 'de ɔɔ' -gbɛin" 'nynɩ. 32 Ka Moisɩ nʋa ɩa' 'ʋn -sea' sʋn, -mɛ ɔ nɩɛ 'de Moabʋ 'a wlao 'di 'de Sudɛn 'ɛ 'jrʋ 'a 'wlʋʋ 'ɩn fɔo, 'de Seriko "juɛi, 'kamɔ -nao. 33 Moisɩ se Lefi 'a "nynuu 'a 'blʋa 'a 'blowɔn 'ɔ 'kɛn "nyɩ. Nyɔsoa, Israɛ -nyʋ 'a Kea mɛ -nɩ ʋʋpʋ 'a 'kɛn ka ɛ "siɛ ɛɛ' 'nynɩ 'de ʋʋpʋ -pee ɛ.